Mellom skam og tillit. Ei kvalitativ studie med utgangspunkt i 20 samtalar frå Kirkens SOS si chat-teneste.

Abstract

Det er dei vanlegaste psykiske lidingane, angst og depresjon, som kostar samfunnet mest. Skam er truleg ei sentral kjensle i mange psykiske lidingar, og det har blitt hevda at depresjon og skam ofte heng uløyseleg saman. I tillegg til å vere kostbart for samfunnet, er kostnadane og konsekvensane for den enkelte store. Det er behov for meir kunnskap om skamma sin fenomenologi. Denne studien tek for seg uttrykk for skam på Kirkens SOS si chat-teneste, og undersøker korleis skam kjem til uttrykk i kommunikasjonskonteksten. Oppgåva tek også opp tillitsspørsmål knytt til skam og chat-rommet. Vidare blir ulike sider ved chat-rommet drøfta som ein terskel for kontakt som særleg kan vere innanfor rekkevidde for ungdommar som strevar med skam. Her blir både potensielt konstruktive og problematiske sider ved skamdeling i chat-rommet lyfta.